ตถาคตา ปฏิสลฺลีนํ เสวนฺติ ฯ อิเมหิ โข มหาราช จตูหิ ตถาคตา ปฏิสลฺลีนํ
เสวนฺติ ฯ อิติปิ มหาราช ตถาคตา น สกรณียตฺตาย น กตสฺส ปริจฺจยาย ปฏิสลฺลีนํ
เสวนฺติ ฯ อถ โข คุณวิเสสํ ทสฺสาวิตาย ปฏิสลฺลีนํ เสวนฺตีติ ฯ สาธุ ภนฺเต นาคเสน
เอวเมตํ ตถา สมฺปฏิจฺฉามีติ ฯ

ตถาคตสฺส อุตฺตริกรณียาภาวปญฺโห นวโม ฯ

ภนฺเต นาคเสน ภาสิตํ เจตํ ภควตา ตถาคตสฺสาปิ อานนฺท จตฺตาโร อิทฺธิปาทา
ภาวิตา พหุลีกตา ยานีกตา วตฺถุกตา อนุฏฺฐิตา ปริจิตา สุสมารทฺธา อากงฺขมาโน อานนฺท
ตถาคโต กปฺปํ วา ติฏฺเฐยฺย กปฺปาวเสสํ วาติ ปุน จ เอวมาห อิโต ติณฺณํ มาสานํ
อจฺจเยน ตถาคโต ปรินิพฺพายิสฺสตีติ ยทิ ภนฺเต นาคเสน ภาสิตํ ตถาคเตน ตถาคตสฺส
โข อานนฺท จตฺตาโร อิทฺธิปาทา ภาวิตา ฯ เป ฯ สุสมารทฺธา อากงฺขมาโน อานนฺท
ตถาคโต กปฺปํ วา ติฏฺเฐยฺย กปฺปาวเสสํ วาติ เตนหิ มาสปริจฺเฉทํ มิจฺฉา ยทิ มาสปริจฺเฉทํ
สจฺจํ เตนหิ กปฺปํ วา ติฏฺเฐยฺย กปฺปาวเสสํ วาติ ตํปิ วจนํ มิจฺฉา นตฺถิ ตถาคตานิ
อฏฺฐาเน คชฺชนํ อโมฆวจนา ชินา ภควโต ตถาคตวจนา สจฺจวจนา ฯ อยํ อภุโต
โกฏิโก ปญฺโห คมฺภีโร นิปุโณ ทุนฺนิชฺฌาสโย โส ตวานุปฺปตฺโต ภินฺทถ
ทิฏฺฐิชาลนฺติ ฯ
ภาสิตํ เจตํ มหาราช ภควตา ตถาคตสฺส โข อานนฺท จตฺตาโร อิทฺธิปาทา
ภาวิตา พหุลีกตา ยานีกตา วตฺถุกตา อนุฏฺฐิตา ปริจิตา สุสมารทฺธา อากงฺขมาโน อานนฺท
ตถาคโต กปฺปํ วา ติฏฺเฐยฺย กปฺปาวเสสํ วาติ เตมาสํ ปริจฺเฉโท จ กโต โส จ
ปน กปฺโป อายุกปฺโป น มหาราช ภควา อตฺตโน พลํ กิตฺตยนฺโต เอวมาห อิทฺธิพลํ
ปริกิตฺตยนฺโต มหาราช เอวมาห อากงฺขมาโน อานนฺท ตถาคโต กปฺปํ วา ติฏฺเฐยฺย
กปฺปาวเสสํ วาติ ฯ ยถา มหาราช รญฺโญ อสฺสาชานีโย ภเวยฺย สีฆคติ อนิลชวสมา
ตสฺส ราชา ชวพลํ ปริกิตฺตยนฺโต สนิคมชนปทราชพลพฺราหฺมณคหปติกอมจฺจชนมชฺเฌ เอวํ
วเทยฺย อากงฺขมาโน โภ อยํ หยวโร สาครชลนฺตํ วิจริตฺวา ขเณน อิธาคจฺเฉยฺยาติ
น จ ตํ อตฺตโน ชววิธึ ปริสาย ทสฺเสตุํ วิชฺชติ จ โส ชโว ตสฺส สมตฺโถ จ
โส ขเณน สาครชลนฺตํ วิจริตฺวา อาคนฺตุํ ฯ เอวเมว โข มหาราช ภควา อิทฺธิพลํ
วิปุลํ วิปฺผารํ ปริกิตฺตยมาโน เอวมาห ฯ ตํปิ เตวิชฺชานํ ฉฬภิญฺญานํ อรหนฺตานํ วิมลานํ